面對經濟不景氣，報導指，已有建築師樓開始要求員工每月須放指定日數無薪假。如果經濟差落去，令人擔心可能有更多行業遭殃。打工仔都係時候學定幾招防下身。當經濟環境變差，員工被要求放無薪假，到底有無權拒絕呢？
首先，其實係要睇員工到底係日薪（或按件計酬）定係月薪員工。如果係按日（或按件）計酬嘅員工，有返工先有糧出，所以被迫放薪假就相當於「停工」。按照《僱傭條例》第31E條規定，停工有一定限制，如下：
-連續四星期停工日數不得超過一半；或
-連續26星期停工日數不得超過三份一；
呢度所講「日數」，係指原本可正常開工嘅日子，所以計算時要先扣除休息日、年假、法定假日等不用上工日子。如果超過以上規定，員工可有權向資方追討遣散費或其他解僱補償。
假使係月薪員工，情況就好唔同。因為月薪員工係以固定合約形式受聘（不論口頭或書面），老闆已承諾員工每月可開工的日數及薪酬。假如老闆想作出改動，須事先經員工同意，否則就屬於單方面更改僱傭合約。如果資方未經員工同意，強行要月薪員工放取無薪假，員工係有權視作欠薪處理，追討番自己被扣減嘅薪金。
法例亦有規定，當出糧日後隔左一個月，仍然未支付薪金（例如，2月1日的應付薪金，等到3月1日都未有著落），僱員可以動用《僱傭條例》10A條，行使「欠薪引致變相解僱」嘅權利，要求僱主支付遣散費、代通知金等賠償。
不過要特別留意，如果僱員曾經同意放取無薪假，就可能意味該段時間嘅僱傭合約條款已經喺雙方接受下更改，失去咗行使以上條款嘅權利。