「英國打工仔你問我答」特別為在英港人而設，希望可解答大家在英國打工遇到的日常問題。
１. 我喺紅日放假係咪有人工？
答：銀行假(bank holiday)唔一定有人工。僱主可以選擇將銀行假包含喺每年28日有薪年假當中，如果僱主選擇咁做，就必須支付銀行假的薪酬，即係要俾全薪。相反，如果僱主無將銀行假包含喺有薪年假之中 (除非合約另有規定) ，咁你放假就冇人工，但亦意味你可另行放取有薪年假。
2. 每星期返三日工，兼職性質，應該享有幾多日年假？
答：英國年假數目每年有5.6星期(遵從歐盟工作時間指令working time directive)，全職僱員每年可享有28日有薪年假，即係5 (每星期工作5日) X 5.6 星期 = 28日。 非全職僱員(employee)或者工人(worker)都可以按比例享有法定有薪年假。以每星期返三日工為例，可以獲得16.8日的有薪年假，即係3 X 5.6星期 = 16.8日。
3. 份工返咗半年，老闆突然話生意唔好，叫我第日唔駛返工，我可以得到乜嘢賠償？
首先僱主冇提前通知終止合約，因此要賠償相當於一星期人工嘅代通知金。其次，如果有年假未放，老闆須按比例支付有薪年假薪金。以上兩項金額都係以正常返工薪金計算。
生意唔好而裁減人手屬於裁員(redundancy)，僱員可獲遣散費。不過需要年資最少做滿兩年，才符合資格。年齡22至40歲嘅僱員，每年可獲1星期人工遣散費。而41歲以上僱員，則每年可獲相當於1.5星期人工嘅遣散費。
4. 上工無耐唔好彩遇上工傷，懷疑老闆無幫我報工傷，應該點做？
英國法例規定僱主、中介公司均有責任向職業健康安全局(Health and Safety Executive)呈報工傷事故。如果因工受傷而導致你連續7日或以上無法工作或無法履行正常職責，僱主必須呈報事故。呢7日不包括事故發生當日，但包括週末同休息日。僱主必須喺事故發生後15日內向HSE呈報。
如果你工傷病假超過7日，但又懷疑僱主沒有向HSE呈報工傷，你可以向經理查詢，或者搵工會代表尋求協助。萬一僱主冇呈報，你亦可自行向HSE呈報工傷事故。不過要注意，不論病假涉及多少天，僱主都有責任將工傷事故紀錄於公司的意外紀錄簿(accident book)。
5. 點解交咗稅仲要交NI？可唔可以選擇唔交？
不可以。NI英文全名是National Insurance, 因英國一些社會福利用保險形式運作，僱主、僱員及自僱人士都要承擔供款責任，與納稅維持一般政府開支，不盡相同。如失業、產假、患病、退休等保障，英國均以國民保險金運作，向符合資格人士提供福利。
當你年滿16歲，收入達到交NI門檻，即每周收入有£242，就要交NI供款。即使你收入未達門檻，如欲日後符合領取國家退休金資格, 可揀自願交納NI，但至少要供款十年。