「英國打工仔你問我答」特別為在英港人而設，希望可解答大家在英國打工遇到的日常問題。
- 我上工時無簽書面合約，想知口頭協議係咪有效？
答：口頭協議(verbal agreement)在普通法制度下都有法律效力，但強烈唔建議大家接受口頭協議。原因好簡單「口講無憑」，萬一同僱主有爭議，書面合約會係有力的證據，讓你可以爭取自身權益。更可況，英國法例規定，僱主必須喺你返工前或返工第一日，同你簽有關僱傭詳情的書面聲明(a written statement of employment particulars)，即係僱傭合約，否則係違反法例規定。如果你無書面合約，建議你盡快向僱主索取，雙方簽署後各執一份。記得要睇清楚內容，同口頭協議係咪一樣。 - 老闆忽然要求我更改返工時間，佢有無權咁樣做？
答：視乎你簽署嘅書面合約內容，係咪有所謂變更條款(variation clause)，例如講明僱主有權可以單方面更改傭傭合約內容，包括返工地點、時間、工作內容、佣金結構等等。但即使有，僱主都需要喺合理範圍內提出有關變動。不過，假如有關變動超出合理人(reasonable person)可接受的範圍，你仍然可以提出異議，甚至可成為將來提出變相解僱(constructive dismissal)嘅理由。如果冇變更條款，僱主必須以公平合理方式同你商量，達到共識後簽署文件確認。 - 我份工屬於中介工人(agency worker)，唔係直接僱主聘用，受唔受法例保障？
答：中介工人同樣受到勞工法例保障，可以享有最低工資、最高工時、有薪假期、工傷保障等，與直接受聘僱員無異。而且當中介工人為同一公司工作12星期後，可以獲得同直接聘用僱員睇齊嘅待遇，例如工資、有薪假期數目等等。 - 返工時合約係用舊最低工資請我，嚟緊最低工資調整，我會唔會有人工加？
答：會有人工加。雖然你份僱傭合約以現有最低工資時薪聘請(2023年4月1日起每小時£10.42)，但英國每年都會調整最低工資水平。2024年4月1日起最低工資會調高到時薪£11.44，僱主亦必須跟法律增加時薪至最少每小時£11.44。 - 法例有最高工時規定，老闆可唔可以要求我每周返工超過48小時？
答：僱主可提出要求每星期返工超過48小時，但你都有權拒絕。如果你願意，你必須以書面方式寫一份豁免書(opt-out agreement)交給僱主。上面除講明你願意每星期返工多過48小時外，亦都要寫明日後你改變主意，會提前幾耐書面通知僱主(最長三個月)。有關豁免書嘅範本，可以喺英國政府網站搵到。